काठमाडौं । आजपनि नेपाली कांग्रेसका पदाधिकारी एवं प्रभावशाली नेताहरूको बैठक बस्दै छ ।
दिउँसो ३ बजे सिंहदरबारस्थित संसदीय दलको कार्यालयमा बैठक बस्ने नेता गोपालमान श्रेष्ठले जानकारी दिए । बैठकमा विशेषगरी मन्त्रिपरिषद् विस्तार र पार्टीको १४औँ महाधिवेशनका विषयमा छलफल हुने उनले बताए ।
वरिष्ठ नेता रामचन्द्र पौडेल पक्षले बैठकमा आफ्नो समूहले पाउने मन्त्रालयको संख्या माग गर्ने र भागबन्डा टुंगो लगाउन दबाब दिने तयारी गरेको एक नेताले जानकारी दिए ।
सर्वोच्च अदालतको आदेश बमोजिम प्रधानमन्त्री बनेका शेरवहादुर देउवाले ७१ औं दिनसम्म पनि सरकार विस्तार गर्न सकेका छैनन् । सरकारलाई पूर्णता दिनुपर्ने दबाबमा रहेका देउवा सरकार गठबन्धनका माग र पार्टीमा पौडेल पक्षका मागले झन सकसमा पर्दै गएका छन् ।
