पश्चिम घाना। घानाको यपिएट सहरमा भयङ्कर विस्फोट भएको छ । विस्फोटबाट कयौँ भवनहरु भत्किएका छन् ।
घटनास्थलमा १७ वटा शव फेला परेका स्थानीय एक अधिकारीलाई उद्धृत गर्दै बिबिसीले जनाएको छ । यद्यपि प्रहरीले मृत्यु भएकाहरुको सङ्ख्याबारे औपचारिक जानकारी दिएको छैन ।
सुनको खानीको रुपमा चिनिने सहरमा विस्फोट भएको हो । खानीका लागि आवश्यक विस्फोटक पदार्थ बोकेका गाडी मोटरसाइकलसँग ठोक्किएपछि विस्फोट भएको बताइएको छ ।
स्थानीय मिडियाहरुले सार्वजनिक गरेको तस्बिर र भिडियोमा विस्फोट भएको स्थानमा धुलो र धुवाँको मुस्लो उडेको देखिन्छ । भग्नावशेषमा च्यापिएकाहरुले चिच्याउँदै सहायता मागेको पनि देखिन्छ । -एजेन्सी ।
