काठमाडौँ । आसन्न संघीय संसदको निर्वाचनलाई लिएर सम्पूर्ण राजनीतिक दल एवं निकायहरु सर्वेक्षणमा व्यस्त देखिएका छन् ।
निर्वाचन मिति घोषणा हुनुपूर्व नै निर्वाचन परिणामलाई लिएर सरकारी तहबाटै निर्वाचन परिणामबारे लेखाजोखा गर्न थालिएको हो ।
गृह मन्त्रालयले दुई महिना लगाएर गरेको एक तथ्यांकअनुसार नेपाली काँग्रेस, नेकपा एमाले र माओवादी केन्द्रले छुट्टाछुट्टै निर्वाचनमा गएमा कसैको पनि बहुमत नआउने देखिएको छ ।
एक्ला एक्लै निर्वाचनमा गए काँग्रेसले ७७ सिटमा जित हासिल गर्नेछ । त्यसैगरी एमालेले ७० सिट र माओवादीले ८ सिट जित्ने रिपोर्ट निकालिएको छ ।
मन्त्रालयले यसको अलवा अर्को रिपोर्ट पनि बनाएको छ । सो रिपोर्टअनुसार माओवादी केन्द्र जता मिल्यो उतै भारी बहुमत आउने देखिएको छ ।
एमाले र माओवादी मिल्दा करिब दुई तिहाइ बहुमत आउने तथ्याङ्कले देखाएको छ ।
एमाले र माओवादी मिल्दा १४५ सिट आउने र काँग्रेस र माओवादी मिल्दा १०९ सिट मात्र जित्ने सो तथ्याङ्कले देखाएको छ ।
गत हप्ता नै गृहमन्त्री बालकृष्ण खाँडले कांग्रेस बैठकमा सर्वेक्षणको रिपोर्ट प्रस्तुत गरेका थिए ।
