काठमाडौं । विश्वकप अन्तिम क्वाटर फाईनलका खेल अन्तर्गत गए राती सम्पन्न खेलमा योसुफ–एन नेसेरिको निर्णायक गोलमा पोर्चुगललाई हराउँदै मोरक्को सेमिफाइनल प्रवेश गरेको छ
अल थुमामा रंगशालामा सम्पन्न क्वार्टरफाइनल खेलको ४२औं मिनेटमा योसुफले गोल गर्दै मोरक्को लाई अग्रता दिलाएका थिए ।
सोहि अग्रता खेलको अन्तिम समयसम्म कायम राख्दै पोर्चुगलमाथि सानदार जित निकालेको मोरक्को विश्वकप इतिहासमा सेमिफाइनल पुग्ने पहिलो अफ्रिकन राष्ट्र बन्यो ।
सन् २००६ पछि पहिलो पटक क्वार्टरफाइनल पुगेको पोर्चुगलले गोल गर्ने थुप्रै अवसर पाएपनि फिनिसिङमा चुक्दा खेल बराबरी गर्ने अवसर खेर फाल्यो ।
समूह चरणमा अपराजित रहँदै समूह विजेताको हैसियतले अन्तिम १८ पुगेको मोरक्को अन्तिम १६ मा स्पेनलाई पेनाल्टि सुटआउटमा हराउँदै क्वार्टरफाइनल पुगेको थियो ।
यस्तै, पोर्चुगल समूह चरणमा लगातार पहिलो र दोस्रो खेल जित्दै अन्तिम १६ मा स्थान बनाउन सफल भएको थियो । समूह चरणको अन्तिम खेलमा पोर्चुगल दक्षिण कोरियासँग हारेको थियो ।
अन्तिम १६ मा पेनाल्टि सुटआउटमा स्विट्जरल्यान्डलाई पराजित गर्दै पोर्चुगलले क्वार्टरफाइनलमा स्थान सुक्षित गरेको थियो ।
त्यस्तै, भर्खरै सम्पन्न क्वाटरफाईनलको दोस्रो खेलमा इङल्यान्डलाई २–१ गोलको नतिजामा पराजित गर्दै साविक विजेता फ्रान्स सेमिफाइनल प्रवेश गरेको छ ।
अल बायट रंगशालामा सम्पन्न खेलमा फ्रान्सलाई जित दिलाउन अउरेलिन चोआमेनी र ओलिभर जिरुडले गोल गरे ।
खेलको १७औं मिनेटमा चोआमेनीले गोल गर्दै फ्रान्सलाई अग्रता दिलाएका थिए । पहिलो हाफमा लिएको अग्रता तोड्दै ह्यारि केनले ५४औं मिनेटमा पेनाल्टी मार्फत बराबरी गोल फर्काए ।
चोआमेनीले वेलिङघामलाई फाउल गरेपछि इङल्यान्डले पेनाल्टी पाएको थियो । सोहि पेनाल्टीलाई सदुपयोग गर्दै केनले बराबरी गोल फर्काएका थिए ।
खेलको ७८औं मिनेटमा एनटोनी ग्रिजमेनको पासमा जिरुडले गोल गर्दै फ्रान्सलाई अग्रता दिलाएका थिए ।
यता, ८४औं मिनेटमा इङल्यान्डले पुनः पेनाल्टि पायो तर ह्यारी केन गोल गर्न चुक्दा इङल्यान्ले खेलमा फर्किने मौका खेर फालेको थियो ।
फ्रान्सले सेमिफाइनलमा मोरक्कोसँग खेल्नेछ । यसअघि मोरक्को पोर्चुगललाई १–० गोलको नतिजामा पराजित गर्दै अन्तिम ४ मा पुगेको थियो ।
यससँगै विश्वकपको सेमिफाइनल समिकरण पुरा भएको छ । अर्को सेमिफाइनलमा अर्जेज्टिना र साविक उपविजेता क्रोएसिया प्रतिस्पर्धा गर्नेछन् ।
