दमक । निकै लामो रस्साकस्सी पछि नेपाली कांग्रेसका संसदीय दलका नेता उद्धव थापा कोशी प्रदेशको मुख्यमन्त्रीमा नियुक्त भएका छन् । विहिवार बेलुका सभामूखको समेत हस्ताक्षर प्रयोग गरेर थापा मुख्यमन्त्री बनेका हुन् ।
झापाको अर्जुनधारा नगरपालिका निवासी मुख्यमन्त्री थापा संघीय सांसदको निर्वाचनमा २- २ पटक पराजित भएका थिए ।
२०७० सालमा भएको दोस्रो संविधान सभाको निर्वाचनमा क्षेत्र नं ४ बाट सामान्य ठानिएका युवा उमेदवार प्रेम गिरी र २०७४ सालको संघीय संसदको प्रत्यक्ष निर्वाचनमा क्षेत्र नं २ बाट एमालेकै उम्मेद्वार पबित्रा निरौलासँग भारी मतान्तरले पराजय व्यवहोरेका थिए ।
तत्कालिन झापा जिल्लाको पार्टी सभापति समेत रहेका थापा जनताबाट अनुमोदन हुन नसकेपछि २०७९ सालको निर्वाचनमा प्रत्यक्षको टिकटै नलिई समानुपातिकबाट सांसद बन्ने भाग्यमानी नेतामा पर्दछन् ।
हाल प्रदेश १ को सभापति समेत रहेका थापा आन्तरिक राजनीतिमा अनुदार नेतामा गनिन्छन् । उनी चर्चित युवा नेता गुरुराज घिमिरेलाई ४ मतले पराजित गर्दै प्रदेश सभापति बन्न सफल भएका हुन् ।
