काठमाडौँ । महिला विश्वकप फुटबल आजदेखि अस्ट्रेलिया र न्युजिल्यान्डमा सुरु हुँदै छ । यी दुवै देशले संयुक्त आयोजनाको जिम्मेवारी पाएको विश्वकप अब ठ्याक्कै एक महिना चल्नेछ । महिला विश्वकप आज दुई स्थानमा उद्घाटन हुँदै छ ।
अस्ट्रेलियाको सिड्नीस्थित ‘स्टेडियम अस्ट्रेलिया’ र न्युजिल्यान्डको इडन पार्कमा उद्घाटन हुँदैछ । सिड्नीस्थित ‘स्टेडियम अस्ट्रेलिया’ मा आयोजक टिम अस्ट्रेलियाले रिपब्लिक अफ आयरल्यान्डसँग प्रतिस्पर्धा गर्दा इडन पार्कमा अर्को आयोजक टिम न्युजिल्यान्डले नर्वेसँग खेल्ने छ ।
विभिन्न कार्यक्रमसहित भव्य उद्घाटन हुने खेल स्थानीय समयअनुसार राति ८ बजे सुरु हुने छ । घरेलु टिम अस्ट्रेलिया आफ्नो पहिलो खेलमा नै जित निकाल्दै सुखद सुरुवात गर्ने लक्ष्यमा छ । तुलनात्मक रूपमा अस्ट्रेलिया रिपब्लिक अफ आयरल्यान्ड भन्दा बलियो टिम हो । त्यस्तै, न्युजिल्यान्ड पनि आफ्नो पहिलो खेलमा जित निकाल्दै राम्रो सुरुवात गर्ने लक्ष्यमा छ । यता, न्युजिल्यान्डलाई हराउने रणनीतिमा नर्वे छ ।
समूह विजेता र उपविजेता टिम नकआउट अर्थात प्रिक्वार्टर फाइनलमा प्रवेश गर्नेछन् । अन्तिम १६ का खेलहरू अगस्ट ५ तारिखबाट सुरु हुने छन् । अगस्ट १५ र १६ तारिखमा सेमिफाइनल खेल हुने छन् । फाइनल खेल भने २० अगस्टमा सिड्नीस्थित ‘स्टेडियम अस्ट्रेलिया’ मा हुनेछ । यो पटकको विश्वकप जित्न सक्ने दाबेदार टिमका रूपमा डिफेन्डिङ च्याम्पियन अमेरिकासँगै जर्मनी, ब्राजिल फ्रान्स, इंग्ल्यान्ड, नेदरल्यान्ड्स रहेका छन् ।
समूह :
समूह ‘ए’
न्युजिल्यान्ड, नर्वे, फिलिपिन्स र स्वीट्जरल्यान्ड
समूह ‘बी’
अस्ट्रेलिया, रिपब्लिक अफ आयरल्यान्ड, नाइजेरिया र क्यानाडा
समूह ‘सी’
कोस्टारिका, जापान, स्पेन र जाम्बिया
समूह ‘डी’
चीन, डेनमार्क, इंग्ल्यान्ड र हाइटी
समूह ‘ई’
नेदरल्यान्ड्स, पोर्चुगल, अमेरिका र भेयतनाम
समूह ‘एफ’
ब्राजिल, फ्रान्स, जमैका र पानामा
समूह ‘जी’
अर्जेन्टिना, इटाली, दक्षिण अफ्रिका र स्वीडेन
समूह ‘एच’
जर्मनी, कोलम्बिया, दक्षिण कोरिया र मोरक्को
