काठमाडौं । नागरिक लगानी कोषले १४ प्रतिशत बोनस दिने भएको छ ।
कोषको काठमाडौंमा सम्पन्न २९ औं वार्षिक साधारणसभाले आर्थिक बर्ष २०७९-८० को आम्दानी बाँडफाँड हिसाव विवरण अनुसार १४ प्रतिशत बोनस सेयर र शून्य दशमलव ७३६८ प्रतिशत नगद लाभांस स्वीकृत गरेको छ । सभा सञ्चालक समितिका अध्यक्ष प्रा.डा.सूर्यबहादुर थापाको अध्यक्षतामा सम्पन्न भएको हो ।
त्यसैगरी आ.व २०७९-८० को वार्षिक प्रतिवेदनमाथि छलफल गरी पारित गरेको छ ।
कोषमा सेयरधनीहरुको सेयर संख्या विगत दुई वर्षमा ५५ प्रतिशतले बढेको कारण १४ प्रतिशत बोनस दिइएको बताइएको छ ।
कोषको एकिकृत सूचना प्रणाली हालै मात्र सञ्चालनमा आएकोले रिकन्सिलेसन सम्बन्धमा केही समस्या देखिएको र आगामी वर्षदेखि रिकन्सिलेसन समस्या समाधान हुँदै जाने बताएको छ ।
साधारण सभामा प्रस्तुत विवरण अनुसार आर्थिक वर्ष २०८०-८१ को चैत मसान्तसम्म कोषको खुद कोष मौज्दात रकम २ खर्ब ४८ अर्ब १ करोड रुपैयाँ पुगेको छ । उक्त अवधिमा कोषले २ खर्व ३६ अर्ब ८० करोड रुपैयाँ लगानी गरेको छ ।
