काठमाडौँ । प्रधानमन्त्री तथा नेकपा (एमाले)का अध्यक्ष केपी शर्मा ओलीले पार्टी विभाजन भएदेखि नेकपा (एकीकृत समाजवादी)का अध्यक्ष माधवकुमार नेपालले आफूहरू ‘जबजवादी’ नभएको कुरा स्पष्ट पारेको दाबी गरेका छन्।
अध्यक्ष ओलीले पार्टी विभाजन भएदेखि नै माधव नेपालले आफूहरू जबजवादी नभएको र जबज नमान्ने बताउँदै आएको उल्लेख गरे। उनले पूर्वप्रधानमन्त्री झलनाथ खनालप्रति लक्षित गर्दै पाँचौँ महाधिवेशनबाटै जबज नमान्ने घोषणा गरिसकेका स्मरण गराए।
“पछि जबज हाम्रो होइन भनेर पार्टी विभाजन भएदेखि। कोही कोही त पाँचौँ महाधिवेशनदेखि नै दक्ष प्रजापतिको टाउको भन्नेहरु स्पष्टै थियो,” ओलीले भने, “कोही कोही पछि पार्टी विभाजन भएपछि खुलेर भने हामी जबजवादी होइनौँ। जबजको पक्षमा छैनौँ। जबज मान्दैनौँ भनेर माधव नेपाल लगायतले भने। त्यो राम्रै गरे। साँचो कुरा गरे। तर साँचो कुरा गर्न यति लामो समय लाग्यो।”
प्रधानमन्त्री ओलीले कुनै समयमा ‘जबजको बाँसुरी बजाए नेता हुन पाइन्छ’ भन्दै जबजको बाँसुरी बजाउनेहरू रहेको पनि टिप्पणी गरे। उनले जबज एमाले पार्टीको सामूहिक बुद्धिको उपज भएको र मदन भण्डारीको अगुवाइमा तत्कालीन समयको सामना गर्न तयार गरिएको नीति भएको बताए।
पुष्पलाल श्रेष्ठको ४७औँ स्मृति दिवसका अवसरमा पार्टी केन्द्रीय कार्यालय च्यासलमा आयोजित कार्यक्रममा बोल्दै उनले यस्तो बताएका हुन्।
