काठमाडौँ । सरकारले देशभर सार्वजनिक सवारीसाधनको नयाँ दर्ता कार्यमा रोक लगाएको छ।
यातायात व्यवस्था विभागले सातै प्रदेश सरकार तथा सबै स्थानीय तहलाई पत्राचार गर्दै सार्वजनिक सवारीसाधनको नयाँ दर्ता नगर्न निर्देशन दिएको हो।
विभागकाअनुसार सार्वजनिक यातायातको वैज्ञानिक व्यवस्थापन हुन नसक्दा अत्यधिक वायु प्रदूषण, सवारी चाप तथा ट्राफिक जाम बढ्दै गएको छ। साथै इन्धनको मूल्यवृद्धिका कारण सार्वजनिक यातायात क्षेत्रमा थप असहजता सिर्जना भएकाले यस्तो निर्णय लिनुपरेको जनाएको छ।
‘सवारी तथा यातायात व्यवस्था ऐन, २०४९’ को दफा २४ उपदफा (३) अनुसार वातावरण प्रदूषण, सवारी चाप, सडकको अवस्था वा सार्वजनिक हितसँग सम्बन्धित कारणले आवश्यक ठानेमा सवारी दर्ता रोक्का गर्न सकिने कानुनी व्यवस्था रहेको विभागले उल्लेख गरेको छ।
विभागले जारी गरेको पत्रमा सार्वजनिक सवारीसाधनसँगै विद्युतीय सार्वजनिक सवारीसाधनको समेत नयाँ दर्ता तत्कालका लागि रोक्का गर्न भनिएको छ।
