काठमाडौं । ट्रान्सपरेन्सी इन्टरनेशनल नेपाल (टीआई नेपाल)को नयाँ नेतृत्व चयनका लागि भएको निर्वाचनमा अध्यक्ष पदका दुई उम्मेदवारको मत बराबरी भएपछि आगामी साता पुनः निर्वाचन हुने भएको छ।
बुधबार काठमाडौंमा सम्पन्न संस्थाको ३१औँ स्थापना दिवस तथा साधारणसभापछि नयाँ कार्यसमिति चयनका लागि निर्वाचन भएको थियो। अध्यक्ष पदमा तीन जनाको उम्मेदवारी परेपछि निर्वाचनमार्फत नेतृत्व चयन गर्ने प्रक्रिया अघि बढाइएको थियो।
अध्यक्ष पदका लागि निवर्तमान अध्यक्ष मदनकृष्ण शर्मा, संस्थापक डा. पोषराज पाण्डे र टंकमणि दाहालबीच प्रतिस्पर्धा भएको थियो। निर्वाचनमा शर्मा र पाण्डेले समान १९–१९ मत प्राप्त गरे भने दाहालले ९ मत प्राप्त गरेका थिए। कुल ४७ मत खसेको थियो।
निर्वाचनमा दुई उम्मेदवारको मत बराबरी भएपछि तत्काल अध्यक्ष चयन हुन नसकेको हो। अब अध्यक्ष पदको टुंगो लगाउन आगामी बुधबार पुनः निर्वाचन गर्ने निर्णय भएको टीआई नेपालले जनाएको छ।
सदाचार, पारदर्शिता, सुशासन तथा भ्रष्टाचार नियन्त्रणका क्षेत्रमा आवाज उठाउँदै आएको टीआई नेपालको आगामी दुई वर्षे कार्यकालका लागि नेतृत्व चयनमा सहमति जुट्न नसकेपछि निर्वाचनमा जानुपरेको हो।
अध्यक्ष पदसँगै कार्यसमितिको सदस्य पदमा समेत मत बराबरी भएको बताइएको छ। त्यसको टुंगो पनि संस्थाको निर्वाचन प्रक्रियाअनुसार लगाइनेछ।
टीआई नेपालको कार्यसमिति ९ सदस्यीय हुने व्यवस्था छ। यसपटक नेतृत्व चयनका लागि भएको प्रतिस्पर्धाले संस्थाभित्र नेतृत्वप्रतिको चासो र आगामी कार्यदिशाबारे देखिएको फरक धारणा पनि सतहमा ल्याएको छ।
भ्रष्टाचार नियन्त्रण, सार्वजनिक जवाफदेहिता, सुशासन र संस्थागत पारदर्शिताका पक्षमा निरन्तर वकालत गर्दै आएको टीआई नेपालको नयाँ नेतृत्व चयनलाई चासोका साथ हेरिएको छ। यसअघि २९औँ साधारणसभाबाट मदनकृष्ण शर्मा अध्यक्ष निर्वाचित भएका थिए।
अब आगामी बुधबार हुने पुनः निर्वाचनले अध्यक्ष पदको टुंगो लगाउनेछ। त्यससँगै नयाँ कार्यसमितिले आगामी दुई वर्षका लागि संस्थाको प्राथमिकता, रणनीति र सुशासन तथा भ्रष्टाचारविरुद्धको अभियानलाई कसरी अघि बढाउँछ भन्ने विषय पनि महत्वपूर्ण बन्नेछ।
