पौष २, काठमाडौं ।
तारकेश्वर नगरपालिकाले नयाँ प्रशासकीय भवन बनाउने भएको छ । जिल्ला समन्वय समिति काठमाडौँका प्रमुख शिवसुन्दर राजवैद्य र तारकेश्वर नगरपालिका प्रमुख रामेश्वर बोहोराले संयुक्त रुपमा बुधबार भवनको शिलान्यास गरेका हुन् ।
सो कार्यक्रममा जिसस प्रमुख राजवैद्यले नयाँ भवन निर्माण पछि नगरपालिकाबाट प्रदान गरिने सेवा प्रवाहमा थप सहजता आउने विश्वास व्यक्त गरे ।
नगरप्रमुख बोहराले भवन तोकिएको समय भन्दा अगाडि नै गुणस्तरीय निर्माण सम्पन्न गर्न अनुगमन गर्ने जानकारी दिए।
नगरपालिकाले आगामी ३० महिनाभित्र भवन सम्पन्न गर्ने लक्ष्यसहित निर्माणको प्रक्रिया अघि बढाएको हो । यसका लागि जिसस रु १० करोड र बाँकी नगरपालिकाबाट उपलब्ध गराइने बताइएको छ ।
भवन चार तले अपाङ्गमैत्री हुनेछ । सबै विषयगत शाखा र नगरको प्रशासन सञ्चालनका लागि सभा हल समेत हुनेछन् । हाल प्रयोग भएको भवन साविकको गाविस भवन हो ।
गाविसको साँघुरो भवनबाट सेवा प्रवाहमा समस्या हुँदै आएको छ । नगरपालिको आफ्नै सभाहल छैन । यसका कारण नगरपालिकाले गर्ने सभा र अन्य कार्यक्रम निजी होटलमा हुने गर्दछन् ।
