नेदरल्याण्डले आउँदो वर्ष कतारमा हुने विश्वकप फुटबलमा स्थान पक्का गरेको छ।
युरोपियन क्षेत्रको छनौट चरण अन्तर्गत मंगलबर राति भएको खेलमा नर्वेलाई २–० ले पराजित गरेर नेदरल्याण्ड्सले विश्वकपमा स्थान बनाएको हो । पराजित भएको नर्वे भने कतार विश्वकपमा खेल्न नपाउने भएको छ ।
घरेलु मैदानमा भएको खेलमा नेदरल्याण्डका लागि मेम्फिस डिपे र स्टिभन बेर्ग्वीज्न गोल गरेका हुन् । स्टिभनले ८४ औँ तथा डिपेले इन्जुरी समयको पहिलो अर्थात् ९१ औँ मिनेटमा गोल गरेका हुन् ।
जितपछि नेदरल्याण्ड समूह जी को शीर्ष स्थानमा रहेको छ । मन्टेनेग्रोलाई २–१ ले पराजित गरेको टर्की २१ अङ्कसहित समूहको दोस्रो स्थानमा छ । अर्को खेलमा लात्भियाले जिब्रालटारलाई ३–१ ले पराजित गरेको छ ।एजेन्सी ।
