काठमाडौँ । बलिवुड चलचित्र ‘इश्क पस्मिना’ आगामी सेप्टेम्बर २३ मा रिलिज हुने भएको छ ।
बलिवुड फिल्म कम्पनी कृष्ण शान्ति प्रोडक्सन हाउसले निर्माण गरेको चलचित्र ‘इश्क पस्मिना”को पोस्टर सार्वजनिक गर्दै निर्माण पक्षले यो फिल्मले सबैको मन जित्न सफल हुने दाबी गरेको छ ।
बलिवुड चलचित्र निर्माता सुरज सुर्या मिश्राले आफ्नो चलचित्रमार्फत अधिकांश नयाँ तर प्रतिभाशाली कलाकारलाई ठूलो पर्दामा अवसर दिएका छन्। टिभी दुनियाँका प्रभावशाली कलाकार भाविन भानुशाली र भारतका चर्चित क्रिकेटर दिपक चाहरकी बहिनी मालती चाहर चलचित्रमा मुख्य भूमिकामा देखिँदै छन् ।
साथै दिग्गज अभिनेत्री जरिना वहाब , बिजेन्द्र काला,कायनात अरोडा र बाल कलाकार गौरीका मिश्रा पनि चलचित्रमा देखिने निर्माण पक्षले जानकारी दिएको छ ।
अरविन्द पाण्डेले निर्देशन गरेको फिल्मको गीत र स्क्रिप्ट समेत पाण्डेले नै लेखेका हुन् । उनले यस चलचित्रले अहिलेसम्म नदिएको अनौठो र नौलो अनुभव दिने बताए ।
भारतका प्रसिद्ध सङ्गीतकार शाम बलकर र शाश्वत प्रखरले इश्क पस्मिना चलचित्रको गीतमा सङ्गीत भरेका छन् भने भारतका चर्चित चलचित्र सम्पादक राजेश पाण्डेले फिल्म सम्पादन गरेका छन् ।
गत जनवरीमा सिम्लामा भारी हिमपात र अत्यधिक चिसो बढेको बेला माइनस डिग्रीमा गएर सुटिङ गरिएको यो चलचित्रको चर्चा त्यस बेलादेखि नै भएको र कलाकारले आफ्नो ज्यान जोखिममा राखेर सुटिङमा सहभागी भएको निर्माण पक्षको दाबी छ ।
चलचित्र इश्क पस्मिनाको ट्रेलर भने सेप्टेम्बर १ मा सार्वजनिक हुने निर्माण कम्पनीले जनाएको छ ।
