काठमाडौं । वरिष्ठ गायक तथा संगीतकार प्रेमध्वज प्रधानको ८५ वर्षको उमेरमा आज निधन भएको छ । छातीमा समस्या देखिएपछि काठमाडौंस्थित न्यूरो अस्पताल भर्ना गरिएका उनको दिउँसो साढे १ बजे निधन भएको पारिवारिक स्रोतले जनाएको छ ।
“अचानक मुटुमा समस्या देखिएपछि अस्पताल भर्ना गरिएको थियो । उहाँको आज दिउँसो साढे १ बजे निधन भएको छ,” पारिवारिक स्रोतले भन्यो ।
उनको आजै अन्तिम संस्कार गरिने बताइएको छ ।
वरिष्ठ गायक प्रधानका थुप्रै गीत लोकप्रिय छन् । ‘घुम्तीमा नआउ है’, ‘तिमीलाई अचेल कहाँ देखुँ’, ‘पर लैजाउ फूलहरु’लगायत उनका दर्जनौं गीत लोकप्रिय छन् ।
