काठमाडौं । आसन्न बैशाख ३० गते हुने स्थानिय तह निर्वाचनको प्रचारप्रसार समय अन्तिम चरणमा पुगेको छ ।
उमेदवार सहितको मतदाताको घरदैलो पुग्ने अभियान, शक्ति देखाउने र्याली तथा आमसभा अन्तिम चरणमा पुगेका छन् ।
स्थानिय निर्वाचनमा सत्ताधारी पार्टीद्धारा केन्द्रमा गरिएको गठबन्धन राजधानीकै पूर्वउत्तरमा रहेको सुन्दर नगरि गोकर्णेश्वर नगरपालिकामा लागुभएको छैन । यहाँ नेकपा एमाले र नेपाली कांग्रेस एक्लाएक्लै, नेपाली कांग्रेसको विद्रोही समूह, नेकपा माओवादी केन्द्र र नेकपा एकिकृत समाजवादीले गठबन्धन गर्दै निर्वाचनमा होमिएका छन् । यसरी हेर्दा यस नगरमा त्रिपक्षीय भिडन्त हुने देखिएको छ ।
शनिवार गोकर्णेश्वरमा प्रमूख प्रतिपक्षी पार्टी नेकपा एमालेले पोलिटव्युरो सदस्यहरु तथा युवा सांसद कृष्ण राई एवं रामेश्वर फुँयालको उपस्थितिमा नगरका उमेदवार सहित विशाल र्याली सम्पन्न गरेको थियो । प्रमूख र उपप्रमूखका उमेदवार क्रमशः उद्धव विष्ट र सान्नानी लामा, नगरका ९ वटै वडाका अध्यक्ष तथा सदस्यहरु, नेता, कार्यकर्ता, शुभेच्छुक, शुभचिन्तक सहितको हजारौं हजारको र्यालीले बौद्ध जोरपाटी देखि सुन्दरिजल सम्मको पदयात्रा गरेको थियो ।
भव्य पदयात्राबाट उत्साहित नेता कार्यकर्ताले एमालेको अभूतपूर्व एकताका कारण जित नजिक रहेको खुलासा गरेका थिए । "विगत १० वर्षको इतिहाँस हेर्दा यत्तिको संगठित र जुझारुपन एमाले कहिले पनि थिएन । यस पटक सबैमा जितको भोक जागेको छ," एमाले नगर कमिटी सदस्य तथा कार्यालय सचिव बिमल पुडासैनी बताउँछन् ।
"घरदैलो अभियानदेखि हरेक गतिविधि चुस्तदुरुस्त रहेकाले 'बिहानीको सूर्यको किरणले दिउँसोको अवस्था बताउँछ' भने जस्तै जितका लागि सबै नेता कार्यकर्ता लालायित देखिएका छन्," उपत्यका विशेष प्रदेश कमिटी सदस्य एकराज लकान्द्रीको भनाई छ ।
बामपन्थी बाहुल्य क्षेत्र भनेर चिनिने निर्वाचन क्षेत्र नं ३ अन्तर्गतको यस नगरीमा २०७४ सालको स्थानिय निर्वाचनमा एमालेले नेपाली कांग्रेसका उमेदवार सन्तोष चालिसेसँग हार बेहोरेको थियो । सो निर्वाचनमा उमेदवारी छनोटमै तिब्र विवाद देखिएका कारण एमालेको हार निश्चित जस्तै देखिएको अर्का स्थानिय कार्यकर्ता बताउँछन् ।
पार्टी हराउन मूख्य भूमिका खेलेको आरोप लागेका तत्कालिन नेता गोपाल बराल लगाएतको समूह नै एमालेमा नरहेका कारण यसपटक एमालेलाई संगठित भएर निर्वाचनमा होमिन र जिततर्फ अग्रसर हुन सहज भएको उनको भनाई छ ।
'पार्टीमा कहिले काहीँ व्यक्तिबाट अन्याय पनि हुन सक्ने तर धैर्य गर्दा प्रतिफल मिठो हुने कुरा बुझेका नेताहरु नै पार्टीलाई भड्खालोमा हाल्न खोज्दा आफैँ भड्खालोमा परे,' उनको आक्रोश थियो । व्यक्ति जति नै राम्रो भएपनि पार्टी चाहिने र त्यो पनि एमाले भन्दा बाहिरका पार्टीको कुनै अर्थ नरहने भएकाले यसपटक एमालेलाई मतदाताले जिताउने पनि उनको विश्वास छ ।
यस पटकको निर्वाचनमा उमेदवारीका लागि थुप्रै नेताको दावी रहेपनि तुलनात्मक रुपमा उद्धब विष्टनै योग्य रहेकाले एमालेको 'सहि उमेदवार, सहि स्थान' छनोटले जित निकाल्न सहज हुने विश्लेषकको भनाई छ ।
यद्यपि अघिल्लो निर्वाचनमा जित निकालेको कांग्रेसले प्रमूखमा नयाँ उमेदवार दिपक रिसाल र उपप्रमूखमा पुनः शान्ति नेपाललाई नै उमेदवार बनाएको छ । सत्तासिन भएर मतदाताका अनेकौं प्रश्नका जवाफ दिनुपर्ने कांग्रेस र प्रमूख प्रतिपक्षी रहेर खबरदारी गरिरहेको एमाले र माओवादी केन्द्र सहितको गठबन्धन बनाएर निर्वाचनमा होमिएको गोपाल बराल समूहको विचमा रहेको त्रिपक्षीय प्रतिस्पर्धाको नतिजा कुर्न भने बैशाख ३० सम्मनै पर्खनु पर्ने देखिएको छ ।
